一文掌握粤拼
识普通话拼音,一文掌握粤拼
粤拼嘅设计大部分同普通话拼音(即《汉语拼音》,下称「普拼」)相同,只需读完两者主要区别,就可以掌握粤拼同粤拼打字。
写法区别 & 音系区别
粤拼同普拼嘅区别分两类:写法区别同音系区别。
- 写法区别 即呢个发音喺普通话同粤语入边都有,只不过喺两种拼音入边用唔同嘅字母来代表,呢类区别一睇就识。
- 音系区别 即普通话冇呢个音,得粤语独有,呢类往往都系普通话母语者学粤语嘅重点难点。
本文讲解发音个阵会用到国际音标(IPA),如果读者唔熟国际音标都冇所谓,直接揿个 掣听例字嘅录音就可以感受到个发音嘞。
本文所有粤拼都用粗体显示,每只例字拼音后面嘅数字 1 - 6 系声调,读者可以暂时先忽略,或者直接跳到 2.8 聲調一节了解完声调再开始读本文。
1. 写法区别
1.1 普拼 y → 粤拼 j
普拼嘅 y 喺粤拼入边写成 j。之所以写成 j 系出于两个考虑:一系呢个音国际音标入边就系写成 [j](普拼嘅 y 系英文嘅写法);二系如果写成 y,会同韵母 yu 捞乱(详细解释可见本站嘅关于 j 同 y)。
例字 | ✔️ 正确写法 | ❌ 错误写法 |
---|---|---|
一 | jat1 | yat1 |
以 | ji5 | yi5 |
夜 | je6 | ye6 |
1.2 普拼 ü → 粤拼 yu
呢个音嘅国际音标系 [y]。呢个韵母虽然系单元音,但喺粤拼入边用咗 yu 两个字母来表示,噉系为咗避免好似普通话嘅 ü 噉要用到附加符号,另一方面都系前文提到嘅,防止同 j 捞乱。
例字 | ✔️ 正确写法 | ❌ 错误写法 |
---|---|---|
猪 | zyu1 | zü1 |
村 | cyun1 | cün1 |
雨 | jyu5 | jü5 / yu5 |
1.3 普拼 gu-、ku- → 粤拼 gw-、kw-
普拼嘅 gu-、ku-,喺粤拼入边用 gw-、kw- 来表示。不过要注意,gu、gun 仲系 gu、gun。
例字 | ✔️ 正确写法 | ❌ 错误写法 |
---|---|---|
广 | gwong2 | guong2 |
狂 | kwong4 | kuong4 |
昆 | kwan1 | kuan1 |
古 | gu2 | gwu2 / gw2 |
1.4 普拼 ong → 粤拼 ung
普拼中嘅 ong 同粤拼嘅 ung 发音系一样嘅,国际音标都系 [ʊŋ],而粤拼中嘅 ong 系普通话冇嘅发音,国际音标系 [ɔŋ]。
ung | ong |
---|---|
钟 zung1 | 庄 zong1 |
公 gung1 | 江 gong1 |
1.5 普拼 ao → 粤拼 aau
粤拼以 u 而非 o 结尾,呢个都系遵循国际音标嘅写法。
例字 | ✔️ 正确写法 | ❌ 错误写法 |
---|---|---|
考 | haau2 | hao2 / haao2 |
包 | baau1 | bao1 / baao1 |
关于粤拼中 a 同 aa 嘅区别下面会讲解。
2. 音系区别
2.1 韵腹 aa 同 a
普拼嘅 a 等同于粤拼嘅 aa,国际音标系 [a]。而粤拼中嘅 a 音喺普通话入边冇。佢嘅国际音标系 [ɐ]。aa 同 a 系两个不同嘅韵腹,唔好捞乱。读者既然识粤语,噉睇下下面几个例字就知道个区别嘞:
aa | a |
---|---|
三 saam1 | 心 sam1 |
山 saan1 | 身 san1 |
稍 saau2 | 手 sau2 |
2.2 韵腹 eo、oe
呢两个韵母嘅国际音标分别系 [ɵ]、[œ],普通话入边都冇呢两个音。
eo | oe |
---|---|
率 seot1 | 削 soek3 |
润 jeon6 | 让 joeng6 |
大家可能会觉得,点解要将 eo 同 oe 分开?呢两个唔系同一个音来嘅咩?其实唔系。eot6 系「术」字嘅韵母,但系 oet6
字就系另一个音嘞。「食完饭 oet6 一啖气出来」,就系呢个韵母 oet6。 再例如形容赶快嘅词「coet4 coet2 声」,好明显唔系「出出声」,所以呢两个系唔同嘅音来㗎。
详细嘅解释可以参考粤拼答问第 F 问。
2.3 韵母 e
普拼嘅 e 国际音标系 [ɤ],即系普通话入边「饿」字嘅韵母,如果佢前面接 y 或者 i 则表达另一个音 [e],例如普通话里「夜」字的韵母。而粤拼入边 e 永远净代表一个发音 [ɛ],呢个音类似英语单词 「yes」 嘅元音。
- 写 se2
- 借 ze3
- 郑 zeng6
- 石 sek6
2.4 韵母 i
普拼入边 i 会根据拼写音节嘅唔同会代表两个唔同嘅音。例如普通话入边「资」嘅拼音系 zi,呢度 i 代表嘅音系 [z̩],而喺「机」嘅拼音 ji 度,i 代表嘅音系 [i]。换句话讲,普拼中 zi ci si 入边嘅 i,同 ji qi xi 入边嘅 i 系两个唔同嘅 i。
粤拼嘅 i 情况类似, 喺大多数时候都代表发音 [i],而拼写成 ik 或 ing 个阵发音就变成 [ɪ]。
[i] | [ɪ] |
---|---|
诗 si1 | 识 sik1 |
仙 sin1 | 星 sing1 |
知 zi1 | 即 zik1 |
2.5 声母 ng-
呢个音嘅国际音标系 [ŋ]。普通话冇呢个声母,而粤语入边声母 ng- 同零声母 Ø- 系区分嘅。而家好多广州人都分唔出嘞,例如将「我」字发成 o5,但系其实个发音系 ngo5。(好彩输入法可以开模糊音,所以如果实在分唔到就开模糊音啦,冚唪唥打晒 ng- 开头就得)。
ng- | Ø- |
---|---|
岸 ngon6 | 按 on3 |
雁 ngaan6 | 晏 aan3 |
2.6 韵尾 -m
普通话入边鼻音韵尾净得 -n 同 -ng(前鼻音同后鼻音),冇 -m。而粤语保留咗 -m、-n、-ng 三种鼻音韵尾。
-m | -n | -ng |
---|---|---|
三 saam1 | 山 saan1 | 生 saang1 |
含 ham4 | 痕 han4 | 行 hang4 |
尖 zim1 | 煎 zin1 | 精 zing1 |
2.7 韵尾 -p、-t、-k
呢三个韵尾就系传统意义上嘅「入声」。普通话冇入声,但系粤语就保留嗮,所以既然读者识粤语,下面几只字嘅发音应该都好容易区分得出来。
-p | -t | -k |
---|---|---|
湿 sap1 | 失 sat1 | 塞 sak1 |
接 zip3 | 节 zit3 | 脊 zek3 |
集 zaap6 | 活 wut6 | 六 luk6 |
2.8 声调
提醒
如果净系想学识用粤拼打字,可以直接跳过本节。粤拼打字唔需要打声调,不过如果打埋声调嘅话可以提高输入速度。
普通话得四个声调,粤语有六个。我哋先回忆下普通话嘅四个声调:

总结出来普通话四个声调嘅调值如下表:
第 1 声 | 第 2 声 | 第 3 声 | 第 4 声 |
---|---|---|---|
55(高平调) | 35(高升调) | 214(曲折调) | 51(高降调) |
而粤语嘅 6 个声调如下图:

6 个调值如下表:
第 1 声 55(高平调) | 第 2 声 35(高升调) | 第 3 声 33(中平调) |
---|---|---|
诗 si1 | 史 si2 | 试 si3 |
第 4 声 21(低降调) | 第 5 声 13(低升调) | 第 6 声 22(中低平调) |
---|---|---|
时 si4 | 市 si5 | 事 si6 |
如果实在记唔住呢啲声调都冇所谓,反正输入法打字唔使打声调。
可能会有人问,点解我觉得广州话唔止六个声调嘅?例如「私人」同「诗人」嘅音唔一样㖞,点解都系 si1?呢个系因为粤语广州话入边嘅第一声的确已经分化咗成两个声调,有啲字例如「诗」读成 高平调 55,有啲字例如「私」读成高降调 53。但系喺粤拼入边我哋唔做区分,全部当成第一声。
详细嘅解释可以参考粤拼答问第 I 问。
练习粤语声调仲有一个好好玩又有效嘅方法,就系利用粤语歌,详见本站嘅用粤语歌练习声调。
2.9 普通话特有、粤语冇嘅音
粤语唔分平翘舌音,所以粤拼入边冇 zh ch sh r 呢四个声母,另外粤语冇普拼中嘅 j q x 音(粤拼嘅 j 等于普拼嘅 y)。
3. 搞掂!
恭喜你读到呢度,粤拼同普通话拼音嘅区别就咁多,其他字母代表嘅发音,例如 b p m f、d t n l、g k h、z c s w 喺普拼同粤拼入边都系一样嘅。要查睇成个粤拼方案嘅完整声韵母表,请见本站嘅 LSHK 粤拼方案。而家先来做几个小练习,睇下你学识打粤拼未:
3.1 练习
写出下面几个词嘅粤语拼音,可以唔理个声调:
- 粤语拼音
- 广州话
- 稍等
- 你哋
- 我同佢
- 香港
- 语言学
答案(可以忽略个声调)
- jyut6 jyu5 ping3 jam1
- gwong2 zau1 waa2
- saau2 dang2
- nei5 dei6
- ngo5 tung4 keoi5
- hoeng1 gong2
- jyu5 jin4 hok6
3.2 工具资源
我哋已经讲解晒粤拼同普通话拼音嘅区别,如果你想对成个粤拼方案有个全面嘅认识,噉务必睇下本站嘅 LSHK 粤拼方案 页面。入边有晒成个粤拼方案嘅所有声母韵母,仲有埋发音示例。每个声韵母都揿下粒 掣听下声,就可以好快熟悉成个粤拼方案。
啱开始用粤拼𠮶阵,往往都会有啲字唔识点拼,呢个时候就一定要查字典。我哋推荐一个网上粤拼字典:
如果遇到字唔识佢嘅粤拼,随时用呢个字典来查。如果想要更多粤语学习资源,请见粤语学习资源。
附录一:粤拼注音文本示例《北风同太阳》
附录二:声调练习表
下表以 si 为示范音节,提供粤语中 6 个声调所有两两组合嘅发音,帮助读者区分各个声调。六个音节嘅例字分别系诗史试时市事。
聲調 | 1 | 2 | 3 | 4 | 5 | 6 |
---|---|---|---|---|---|---|
1 | 11 | 12 | 13 | 14 | 15 | 16 |
2 | 21 | 22 | 23 | 24 | 25 | 26 |
3 | 31 | 32 | 33 | 34 | 35 | 36 |
4 | 41 | 42 | 43 | 44 | 45 | 46 |
5 | 51 | 52 | 53 | 54 | 55 | 56 |
6 | 61 | 62 | 63 | 64 | 65 | 66 |