点解要用粤拼，唔用其他粤语拼音方案？
成日都会有人问，点解我要拣 LSHK 粤拼方案，而唔用耶鲁拼音、教院拼音、广东省政府拼音（饶秉才方案）、香港政府拼音等等？呢篇文章详细解释咗点解我哋要拣粤拼，而唔系其他粤语拼音方案。
拼音方案设计原则
拼音方案又叫罗马化方案。因为汉字唔系表音文字，所以用汉字书写嘅语言都需要一门拼音方案嚟表示佢嘅发音。所以对于拼音方案嚟讲，最重要嘅用途就系清晰准确噉表示到呢门语言嘅音位系统。而喺廿一世纪互联网时代，拼音方案又多咗另一个重要用途就系协助电脑信息处理，尤其系做拼音输入法。根据呢两点，我哋可以总结出一套评价拼音方案优劣嘅原则。跟住落嚟我哋会逐个讲解呢几条原则，分别举例说明，点解我哋要用粤拼，而唔用其他方案。
原则一：「一个符号对应一个音位」
拼音方案要清晰准确兼简洁噉表示音位系统，就需要遵循「一个符号对应一个音位」原则。即系话，如果出现咗「一个符号可以代表多个音位」或者「一个音位可以用唔同符号转写」，噉我哋就可以话呢个拼音方案系混乱唔一致嘅，无法准确简洁噉表达呢门语言嘅音位系统。
一个最熟悉嘅反例就系我哋嘅普通话拼音（《汉语拼音方案》）。例如佢嘅字母 e 系一个音位转写，当跟喺 g k h 后面例如「哥」「科」「呵」个阵佢嘅发音系 /ɤ/，而喺韵母 ie 入边例如「些」字佢嘅发音系 /e/。但系普拼方案嘅声母 j q x 又系音值写，因为佢哋同 g k h 系同一个音位。即系话普通话拼音方案一时用音值转写一时用音位转写，而唔系一致转写音位，呢个就违背咗我哋嘅原则。
呢条原则仲有另一层意思，就系一个符号具体表示咩发音，唔应该依赖佢嘅环境（即系左右两边嘅符号）嚟确定。就例如耶鲁拼音入边，字母 a 既可以表示长 a，又可以表示短 a。下边嘅表格系耶鲁拼音对三只字「花」「翻」「分」嘅拼法。我哋可以睇到佢喺开音节（冇鼻音或者入声韵尾）个阵 a 代表 /a/，闭音节（有鼻音或者入声韵尾）个阵代表 /ɐ/，呢个就系「一个符号 a 代表 /a/ 同 /ɐ/两个音位」嘞。同样嘅，「花」同「翻」嘅元音都系 /a/，但系佢一个拼成 fa 一个拼成 faan，即系「一个 /a/ 音位用 a 同 aa 两个符号嚟表示」。
| 花 /a/ | 翻 /a/ | 分 /ɐ/ |
|---|---|---|
| fa | faan | fan |
所以耶鲁呢度就系「依赖环境嚟确定一个符号实际代表咩音」，符号 a 究竟代表 /a/ 定系 /ɐ/ 要靠系开音节定闭音节嚟判断（后边有跟个 n 嘅话就系 /ɐ/，乜都冇就喺 /a/）。呢个就系耶鲁嘅设计缺陷之一。粤拼统一规定 aa 就系 /a/，a 就系 /ɐ/ ，唔使睇环境直接就可以确定系咩音。
原则二：避免使用附加符号同非 ASCII 字符
我哋要尽量令一套拼音方案净使用 ASCII 字符集（美国资讯交换标准代码）入边嘅字符，即系要尽量斋用廿六个英文字母加数字就表达晒成个方案，唔好用 ´ˋˇ˘˜ 呢啲符号。呢个系出于信息时代方便信息处理考虑嘅，因为噉样可以避免好多潜在问题同 bug。
一个最熟悉嘅例子，就系普通话拼音入边嘅 ü。相信大家都清楚打呢个 ü 有几麻烦，估计大家平时打呢个符号都系网上复制粘贴落嚟嘅。用 ü 呢个符号除咗输入麻烦之外，仲有个问题就系佢唔喺 ASCII 字符集入边，所以冇办法用最简方式嚟编码（转成 v 系另一回事），噉样一嚟用非 ASCII 编码会增加内存占用，二嚟编码转换个阵有可能会出现各种 bug。同样嘅，普通话拼音用 ˉˊˇˋ 四个符号嚟标注声调，输入唔方便亦都容易出错。当然呢个系因为普拼方案喺上世纪五十年代设计，个阵电脑仲未普及，所以呢处疏忽都系正常嘅。
另一方面，我哋知道拼音方案仲有一个用途就系攞嚟做拼音输入法。如果一个拼音方案到处都系 ˉˊˇˋ，大家又点打字呢？好彩普通话拼音入边呢啲符号净系用嚟表示声调，而普通话拼音输入法就算唔打声调都系冇问题嘅。如果话呢啲符号唔单只用嚟表示声调，仲要攞嚟区分辅音元音，好似 â ä ô ö û ü 噉嘅话就大镬嘞，拼音输入法可能会麻烦到大家都唔想用。
原则三：符号选择尽量符合大众习惯
呢条原则嘅意思系，选择字母嚟对应发音个阵，要尽量符合大家嘅既有认知，例如字母 a o e 一般用嚟表示元音，b p m f 表示唇音等等。一个比较出名嘅反例就系切洛基语嘅书写系统，佢用字母 Ꭰ 嚟表示发音 /a/，字母 Ꮃ 表示发音 /la/，呢个就好反直觉嘞。再例如话普通话拼音嘅 q 代表发音 /t͡ɕʰ/，呢个就唔符合英语人士嘅习惯。因为英文入边 q 一般表示 /k/，所以西方人学普通话拼音个阵，第一眼见到个 q 就容易下意识噉发成个 /k/ 音，要花一段时间先适应到过嚟。
粤拼经常畀人批评用字母 j 嚟表示个发音 /j/
原则四：准确反映语言音位系统
呢条可以讲系最重要嘅设计原则，但亦都系最麻烦最容易出问题嘅。因为音位分析有一定嘅主观性，有时无法将一门语言嘅音位系统完全确定落嚟。最熟悉嘅例子就系普通话，目前学术界对语普通话嘅元音音位数量仲未有一致共识（例如是否考虑埋儿化音又会影响个分析结果）。所以呢啲差异都会直接影响到拼音方案嘅设计，有时甚至会影响到拼音方案嘅表达能力，严重嘅话会导致个方案冇办法表示一啲音。
要注意嘅系，呢一条原则有时系同第一条原则相冲突嘅。譬如英语入边嘅 h 同 ng 音互补，可以夹硬归纳成同一个音位然后用同一个字母嚟表示，但系噉样就会好反直觉唔适合大众使用。呢种原则一同原则三取舍嘅问题，我哋会喺下面嘅例子中遇到。
其他粤语拼音方案嘅缺陷
明白咗拼音方案嘅设计原则之后，我哋就可以逐个嚟睇最出名嘅几个粤语拼音方案：耶鲁拼音、教育学院拼音方案（教院式拼音）、广州话拼音方案（饶秉才方案），分析下佢哋有咩设计问题，从而证明点解我哋要拣粤拼。
耶鲁拼音
耶鲁拼音算系除咗粤拼之外最常见嘅粤语拼音方案嘞。同粤拼相比主要有下面几个区别：
- 耶鲁拼音中，/a/ 喺开音节用 a 表示，闭音节用 aa。/ɐ/ 喺闭音节中用 a 表示，无法表示开音节 /ɐ/。
- 耶鲁拼音用 j ch y 嚟代表 /ts/、/tsʰ/、/j/ 三个音。因此元音 /yː/ 需要用 yu 嚟表示。
- 耶鲁方案唔区分 /ɵ/ 同埋 /œ/，两者都用 eu 嚟表示。亦都因为噉耶鲁拼音无法表示 /ɛːu/ 呢个音。
- 耶鲁用附加符号 ˉˊ 同埋字母 h 嚟表示声调（新版本加入咗数字标调）。
首先第一点我哋已经喺上文讲过。耶鲁拼音噉样设计，系因为当年嘅音位分析认为开音节 /ɐ/ 并唔存在，所以干脆将开音节 aa 都缩写成 a。噉一缩写法就出问题嘞，首先佢违背咗我哋嘅第一条原则「一个符号严格对应一个音位」，令学习者困惑提高掌握成本。然后佢噉导致无法表示开音节嘅 /ɐ/ 字，例如语气词「嘞」，违背咗原则四。所以呢个系个好大嘅设计缺陷。
第二条入边，耶鲁拼音用咗 yu 嚟表示 /yː/，又系违背咗第一条「一个符号对应一个音位」嘅原则，因为佢需要根据佢嘅环境嚟判断实际发乜音。首先耶鲁拼音已经用咗 y 嚟代表 /j/、u 代表 /u/，而家又规定 yu 组合起身变成 /yː/，即系「一只字母代表一个单元音，两只字母组合起身又代表另一个单元音」，噉样一嚟又系令学习者困惑，二嚟都唔方便电脑信息处理（输入法难以处理简拼、写正则表达式都要加入环境判断）。而粤拼方案对于呢个问题嘅处理，我哋会喺最尾嘅粤拼缺陷进一步说明。
第三条，耶鲁拼音用 eu 嚟代表 /ɵ/ 同 /œ/，呢个就系原则四入边讲嘅音位分析嘅问题嘞。呢条直接导致咗耶鲁拼音冇办法表示 /œ/ 同 /ɛːu/ 呢啲音，影响咗呢个拼音方案嘅表达能力，就好似下面呢个表噉：
| 睡 /sɵi˨/ | 掉 /tɛːu˨/ | 𠰲 /œt˨/ | |
|---|---|---|---|
| 耶鲁拼音 | seuih | 无法表示 | 无法表示 |
| 粤拼 | seoi6 | deu6 | oet6 |
第四条用附加符号同埋 h 嚟表示声调，例如「蛇」嘅发音拼成 sèh，系既违背咗原则二，又违背咗原则一，因为 h 已经用咗嚟表示声母 /h/。好彩新版耶鲁拼音都增加咗用数字嚟表示声调嘅方案，噉样对于信息处理系个好大嘅帮助。
所以综合嚟讲，耶鲁拼音嘅设计违背咗原则一二四（第三条比较主观无法定夺），呢啲设计缺陷足以令我哋放弃耶鲁拼音改用粤拼。
广州话拼音方案（饶秉才方案）
广州话拼音方案系 1960 年广东省政府公布嘅粤语拼音方案，后嚟喺 1980 年出咗修订版，因为系饶秉才教授修订嘅，所以又称饶秉才方案。我哋呢度以 1980 年修订后嘅版本为准，讲解呢个方案有乜设计问题。除咗声调之外，广州话拼音方案同粤拼嘅主要区别有以下：
- 用 e ê é ü 分别表示元音 /ɐ/、/œː/、/ɛː/、/yː/
- 用 y 表示辅音 /j/，gu、ku 表示 /kʷ/、/kʷʰ/
- 同时用 z c s 同 j q x 嚟表示 /ts/、/tsʰ/、/s/，两组其实冇分别，都系表示同一组音位
- 入声韵尾用 -b -d -g 表示
- 唔区分 /ɵ/ 同 /œ/，无法表示粤拼中嘅 oet 音
好显然，第一点完全违背晒原则二，用咗大量嘅附加符号嚟表示啲元音。噉样严重阻碍咗电脑信息嘅处理，亦都冇办法用嚟做输入法。而第三条则违背咗原则一，同一个音位用唔同嘅符号嚟表示。呢条设计当初系为咗兼容普通话拼音，但其实系完全冇必要嘅，反而仲增加咗困惑度。
而第二同第四点都系比较主观嘅符号选择问题，唔可以算缺点。第五条就同前面讲嘅耶鲁拼音一样，冇办法表示粤拼入边嘅 oet eu 呢两个音节。所以总嘅嚟讲第一同第三点系最严重嘅缺陷，呢两点直接决定咗广州话拼音方案冇办法喺信息时代推广普及。
教育学院拼音方案（教院式拼音）
教院式拼音亦都系除咗耶鲁粤拼之外好多人用嘅一个粤语拼音方案，除咗声调之外，佢同粤拼嘅主要区别有以下：
- 用 dz 同 ts 嚟 表示 /ts/ 同 /tsʰ/
- 用 y 嚟表示 /y/
- 唔区分 /ɵ/ 同 /œ/，统一用 oe 表示
- 用 oey 嚟表示 粤拼中嘅 eoi
总体嚟讲，教院式拼音系好接近粤拼嘅，设计都比较科学。第 2 同第 4 条都系主观上嘅符号选择问题，唔系缺点。而第 3 点上面都讲过嘞。唯独第一点系一个小缺陷。因为用 dz 同 ts 除咗两个字母冗长冇必要之外，仲会影响到输入法嘅编码处理。例如好多输入法都有声母简拼功能，如果我打 ts，噉应该系识别成「此」呢一只字嘅声母，定系「听写」呢两只字嘅声母呢？噉样又增加咗重码率，提高咗处理成本亦都令输入法更难用。
香港政府粤语拼音 / 邮政式粤语拼音
香港政府粤语拼音（邮政式拼音承袭香港政府拼音）系泛指香港政府用嚟拼写街道名同人名嘅拼音。因为佢源于早期西方人用拉丁字母拼写粤语嘅习惯，所以用都咗好多附加符号，例如 ’ 表示送气，ò 表示 /ou/ ü 表示 /y/ 等等。但系英文入边唔用得附加符号，所以香港政府嘅公文入边要删晒呢啲附加符号，噉就导致咗好多混乱。再加上政府冇规定一定要拼广州音，唔同人可以用嚟拼自己嘅方音，所以就成日有「同一只字有几种拼法」、「一个拼写可以代表唔同嘅音」，例如：
- 「蔡」有 Choi、Choy、Tsoi 三种拼法
- 「叶」有 yip、ip 两种拼法
- chun 可以表示「俊」，又可以表示「珍」
- chai 可以表示「柴」，又可以表示「仔」
所以严格嚟讲，香港政府拼音唔可以算系一个拼音系统，因为佢连拼音方案嘅最基本功能——准确一致噉表示一门语言嘅发音系统都做唔到，即系话违背晒原则一。所以呢个拼音方案既做唔到字典亦都做唔到输入法，我哋更加冇理由要用呢只拼音方案。
粤拼嘅缺陷
关于 j 同 y
粤拼成日畀人呻得最多嘅，就系个 j 嘞。好多人都问点解唔攞 y 嚟表示 /j/，因为呢个的确符合大众嘅习惯，无论系普通话拼音定系英文都系用 y 嚟表示 /j/。噉点解粤拼要违背原则三用 j 嚟代表 /j/，而唔用 y 呢？因为如果我哋用咗 y 嚟表示 /j/，噉会引出一个问题：廿六个英文字母就得咁多，家阵用咗 y 嚟表示 /j/，噉用乜嚟表示 /y/？
对于呢个问题，耶鲁拼音嘅答案系：用 y 表示 /j/，然后用环境判断咩时候代表 /y/。如果字母 y 后面跟嘅系 u，噉两个字母 yu 串起身就代表 /y/。呢个就系上文讲到嘅「一只字母代表一个单元音，两个组合起身又代表另一个单元音」。即系话，耶鲁拼音牺牲咗原则一嚟换取原则三，所以呢个就系取舍问题嘞。噉边个原则重要啲？肯定系第一条，「一个符号对应一个音位」最重要。因为拼音方案嘅根本目的就系准确表示语言嘅音位系统，而且呢个一一对应关系如果打破咗嘅话会带嚟好多麻烦，例如上文都讲过嘅提高学习成本同信息处理成本、容易造成混淆等等。
另一方面，用 j 嚟代表 /j/ 都唔系咩太违背原则三嘅选择，因为用 y 嚟代表 /j/ 只不过系普通话拼音同英文嘅书写习惯。世界上仲有好多语言嘅书写系统，例如德文都系用 j 嚟代表 /j/ 嘅。所以其实净系普通话拼音同英文使用者唔适应呢个设计唧，换成德文使用者就会觉得好自然嘞。况且大家都睇到，国际音标入边呢个音（硬腭近音）嘅符号就系 /j/，所以粤拼噉写都系遵循国际音标写法。
韵母 yu
如果真系话粤拼有咩真正嘅设计缺陷嘅话，噉的确有一个，就系用两个字母 yu 嚟表示元音 /y/，显得冗长冇必要，完全可以单用一个 y 就搞掂又冇副作用。LSHK 当初设计噉用两个字母，系考虑到大众习惯同历史遗留问题（原则三）。不过好消息系，目前市面上嘅粤拼输入法基本上都支持 y = yu 嘅缩写，所以大家打字𠮶阵如果懒得打 yu 两个字母，单打一个 y 都系完全冇问题嘅。
关于粤拼嘅设计，LSHK 嘅官网上面都有自己嘅 FAQ，大家可以参考了解设计当初考虑过嘅各种问题。
所以
仲所以咩？用粤拼啦！