利用吳語學好粵拼搭粵語發音

粵語搭普通話接近，缺乏清濁對立；個咾拿 b-、d-、g-、z- 表示弗送氣音 [p]、[t]、[k]、[ts]，p-、t-、k-、c- 表示送氣音 [pʰ]、[tʰ]、[kʰ]、[tsʰ]。 具體對應： 粵 b-：吳「包」；粵 d-：吳「刀」；粵 g-：吳「高」；粵 z-：吳「糟」； 粵 p-：吳「泡」；粵 t-：吳「滔」；粵 k-：吳「敲」；粵 c-：吳「抄」。 粵拼 b-、d-、g-、z- 全是「刮剌鬆脆」个清音，當心弗要讀成功渾厚低沈个濁音（吳語「跑」「淘」「搞」「曹」等字聲母）。

粵拼 gw-、kw- 表示圓脣个 g-、k- 聲母（1.1 節），分別接近吳語「光」搭「曠」个聲母。 但不過，gu、gun 還是寫成功 gu、gun，因爲此地 u 是主元音（韻腹）。

迭個三隻聲母吳語裏向全有。粵 s-：吳「蘇」;粵 f-：吳「夫」；粵 h-：吳「蟹」。

其中，h 搭吳語一色一樣，是㗅嚨裏向發出來个音。

迭個三隻聲母吳語裏向全有。粵 m-：吳「毛」；粵 n-：吳「腦」；粵 ng-：吳「咬」；粵 l-：吳「牢」。

粵拼以 j- 表示近似吳語當中「央」「羊」个聲母，拿 w- 表示近似吳語當中「汪」「黃」个聲母。

粵拼對粵語元音个表達是：i、e、yu、eo、oe、a、aa、u、o。 迭個九隻元音全好作韻腹。其中，eo 搭 a 是短音，分別搭長音 oe 搭仔 aa 對立。 外加，eo 搭 oe，a 搭 aa，弗單單長短兩樣，發音也兩樣个，個咾邪氣要當心。

迭個四隻元音吳語裏向全有。下列吳語例字韻母即粵拼元音讀法： 粵 i：吳「衣」「西」；粵 e：吳「晏」「三」；粵 yu：吳「迂」「需」；粵 u：吳「烏」「蘇」；粵 o：吳「凹」「稍」。

迭個兩隻韻母个國際音標分別是 [ɵ]、[œ]，吳語無麼一色一樣个讀音，但有得一隻接近个音 [ø]，即「安」「竿」「看」韻母个發音。 粵拼 oe 个讀法，只要在發吳語「安」韻母基礎上，嘴巴張大一眼就來三哉。張大个程度，大概搭讀吳語「凹」字韻母个辰光差大弗多。 連下來再看看看粵拼 eo 个讀法：在發吳語「安」韻母基礎上，嘴巴張開大小弗變，舌頭擺平一眼，就是粵拼 eo 个讀音哉。另外，eo 發音比 oe 短。

粵拼 aa 个國際音標是 [a]，搭吳語「矮」「街」兩字韻母發音一樣。 粵拼 a 个國際音標是 [ɐ]，吳語無麼一色一樣个讀音，但有得一隻接近个音 [ə]，即「僧」「色」兩字韻母；嘴巴張來再大一眼，就好發得出 a 哉。

粵語韻尾分三種：半元音韻尾（搭韻腹形成功雙元音）、鼻音韻尾搭塞音韻尾。

其中半元音韻尾粵拼用 -i、-u 表示。形成功个雙元音交關多，枚舉：aai、aau、ai、au、oi、ou、eoi、ei、iu、ui。 吳語缺乏雙元音，不過粵語雙元音讀法蠻便當，基本上向只要讀準足單元音，再組合在一淘就好哉。個咾此地弗作具體解釋。

粵語有得 -m、-n、-ng 三種鼻音韻尾。 其中，-ng 在吳語裏向也有，即「新」「心」「星」「身」「深」「升」个韻尾；ng 也是吳語當中「五」「魚」个讀音。 別個兩隻鼻音韻尾吳語缺乏，但有相應音節。「姆媽」个「姆」就是 m 音，「娪奶」（也有人叫「阿奶」）个「娪」就是 n 音。 個咾，只要拿韻腹个元音搭迭眼鼻音組合在一淘就好發得出粵語个讀音哉。

迭個三隻塞音韻尾也就是所謂「入聲韻」。吳語也有得入聲，讀來比較短促：像數字「一」「六」「七」「八」「十」全是入聲。 但是吳語个入聲是弗帶 -p、-t、-k 塞音尾巴，迭個就是搭粵語兩樣。倒過來講，吳語入聲加上仔迭個三隻塞音尾巴，就搭粵語發音差弗多哉。